110-a Universala Kongreso de Esperanto

La kongresejo troviĝas proksime al la urbocentro. Vi povas promeni libere tra la stratoj de Brno kaj orientiĝi per poŝtelefonaj mapoj / navigiloj kiel OsmAnd aŭ Google Mapoj.

OsmAnd eĉ havas interfacon en Esperanto, la nomon de pluraj lokoj ĝi montras en Esperanto, funkcias sen interreto (se vi anticipe elŝutas la mapon por la areo), kaj taŭgas ankaŭ por piedirantoj. Ĝi disponeblas en la apvendejoj de Android kaj iOS, kaj ĉe osmand.net.

Se vi (por Android) unue instalas la apvendejon F-Droid (de f-droid.org), vi povas per ĝi instali OsmAnd+ kun senlima eblo elŝutadi novajn mapojn. Por agordi Esperanton interfaca lingvo, klaku al la burgera menuo (☰) sube maldekstre, Agordoj > Ĝeneralaj agordoj > Lingvo de aplikaĵo (Display language), elektu Esperanton kaj konfirmu.

La kongresejo estas la Universitato de Mendel (mallonge “MENDELU”), la konstruaĵoj „X“ kaj „Q“:

Mendelova univerzita v Brně
Zemědělská 1665/1
613 00 Brno
Ĉeĥio

Tiu ĉi universitato estas la plej malnova agrikultura universitato en Ĉeĥio, pasintjare ĝi festis sian 105-jariĝon. Nuntempe ĝi estas moderna universitato, kiu havas diversajn fakultatojn kaj ĉ. 10 000 studentojn.

Ni kongresas en la konstruaĵo de Ekonomia kaj negoca Fakultato (Provozně ekonomická fakulta) „Q“ (legu „kuo“), kie troviĝas diversgrandaj prelegsalonoj kaj kafejo kun manĝetoj, trinkaĵoj kaj kafo. En la tuj apuda konstruaĵo “X”( legu „ikso“) troviĝas libroservo kaj manĝejo. Ambaŭ konstruaĵoj estas novaj, modernaj, klimatizataj kaj havas liftojn.

La kongresurbo de nunjara UK estas la dua plej granda ur­bo en Ĉeĥio post la ĉefurbo Prago. Kun proksimume 400,000 loĝantoj, Brno estas sufiĉe granda por oferti viglan kaj interesan urban vivon, sed samtempe sufiĉe malgranda por krei varman kaj bonvenigan etoson.

Brno estas riĉa je historio kaj kulturo, kio videblas en ĝiaj arkitekturaj vidindaĵoj – de la historia burgo Špilberk kaj la Katedralo de Petro kaj Paŭ­lo (kiu aperas en la emblemo de la UK!) ĝis la fama Vilao Tugendhat. Dum la kongreso, vi ĝuos la unikan etoson de Brno, kie la historia heredaĵo harmonie kuniĝas kun moderna evoluo.