Jam en du tagoj ni renkontiĝos kun multaj el vi ĉe la plej granda esperanta evento de la jaro – la 110-a Universala Kongreso en Brno. Antaŭ ol vi ekveturos al Brno, ni rekomendas, por pli facila orientiĝo ĉe la kongreso, koni la jenajn informfontojn:

Reta versio de la programo – ĉiu partoprenanto ricevos presitan Kongresan libron, sed en ĝi ne estas konsideritaj lastmomentaj ŝanĝoj en la programo, kiujn oni ne povas eviti en tiel granda evento. Por aktualaj informoj, ni do rekomendas la elektronikan version de la programo, kiu estas konstante ĝisdatigata.

Se vi partoprenas la kongreson unuafoje, certe vizitu jam sabate je la 17:00 la programon Unuafojaj Kongresanoj (salono Gacond Q02). Vi ekscios detalojn pri diversaj specoj de programoj ĉe la kongreso, kiel uzi la Kongresan Libron, pri kongresaj kutimoj kaj aliaj utilaj informoj.

Kongresa grupo en la aplikaĵo Telegram – en la kanalo Anoncoj estas publikigitaj anoncoj aŭ eblaj ŝanĝoj. En aliaj kanaloj partoprenantoj povas diskuti, sed tio ne estas informoj de la organizantoj, do ne necesas sekvi ilin detale. Instalu la apon en via telefono, klaku la butonon sube, respondu al la demando kaj aliĝu al la grupo UK 2025.